Mbiyen Nyolong Bibit Wit Duren, Siki Dadi Pengusaha Duren Sukses

Selasa, 09 Juli 2019 : 19:49
Yuh Waca

Tan Eow Chong, salah siji pengusaha duren sing paling sukses nang Malaysia. Dadi pengusaha sukses, sapa sing nyana nek Tan Eow Chong kudu ngalami urip sing mandan melasi.

Awal-awale, Tan ora sengaja nyicipi duren sing didol nang pinggir dalan. Gara-gara kuwe, Tan kepengin nandur duren nang latar umahe.

Tan terus taren meng bakul duren mau, ulih apa ora njaluk bibit durene. Jelas bakul duren kuwe ora gelem aweh. 

Akhire, Tan nekad nyolong bibit duren cilik aring bakul mau. Ulih bibit duren kasil nyolong, Tan mulai nandur duren nang latar. Tan kawit cilik wis dadi petani dadi biasa nanduri wit-witan. 

Tan terus fokus nandur duren sampe akhire Tan dadi wong handal sing tukang nggabung-nggabungna bibit duren sampe ketemu duren sing enak.

Tambah suwe, Tan nemokna duren sing rasane enak lan beda karo duren liyane. Akhire, ketemu duren sing siki dadi idolane wong akeh. 

Telungpuluh lima taun nggoleti, akhire ketemu duren Musang King sing siki dadi primadona. 

Duren Musang King suwe-suwe dikenal jog China lan disenengi nang wong. Tapi ana juga wong sing ora seneng duren Musang King merga ambune sing nyengat banget. Tapi ambune kuwe sing dadi ciri khas sing nambaih daya tarik wong-wong sing seneng.

Sing marekna duren Musang King tambah terkenal yaiku pas taun 2010 mbiyen. Wektu kuwe ana pengusaha sukses kan China, jenenge Stanley Ho. 

Stanley Ho tuku 88 duren Musang King nganggo pesawat pribadine. Maune Stanley arep tuku 98 nanging stoke wis kadung entong. 

Duren-duren mau arep dibagikna meng pengusaha liyane. Musang King tambah populer, wong-wong China pada nggoleti duren Musang King. Tekan siki, usahane Tan tambah sukses. 

Tan Eow Chong dadi pengusaha duren Malaysia sing paling sukses. Tan juga dadi duwe julukan Raja Duren.
Share :