Zimbabwe Adol Gajah Meng China lan Uni Emirat Arab Gara-Gara Kelewihen Populasi

Kamis, 16 Mei 2019 : 16:26
Yuh Waca

Zimbabwe, negara sing ana nang Benua Afrika wis adol meh 100 gajah meng negara China lan Uni Emirat Arab 6 taun kepungkur. Total, kasil dol-dolan gajah 6 taun kuwe kira-kira Rp 39 milyar utawa 2,7 juta dolar Amerika.

Gajah-gajah mau didol mergane populasi gajah nang Zimbabwe wis mbludak alias kelewihen. Juru omong Otoritas Pengelolaan Taman lan Margasatwa Zimbabwe, Tinashe Farawo ngomong nek gajah nang Zimbabwe ngebek-ngebeki Taman Nasional, pada mlebu meng pemukiman, ngrusak, lan nganggu menungsa.

"Dewek duwe 84.000 gajah banding karo daya tampung mung 50.000.", jere Tinashe Farawo mbenerna ana gajah sing didol.

Farawo ngomongna nek wis ana 200 wong mati gara-gara 'konflik kewan karo menungsa' nang limang taun meng mburi. Ora mung kuwe tok, Farawo juga ngomongna nek seora-orane 7.000 hektar tanduran dirusak nang gajah.

Duit kasil dol-dolan gajah mau bakal dialokasikna go proyek anti perburuan liar, pekerjaan konservasi, penelitian, lan kesejahteraan.

Jane populasi gajah mau ora kelewihen, nanging habitat asline bae sing pada ilang amarga perubahan iklim, taman nasional pada garingen dadi gelem ora gelem gawe para pachyderma golet panganan lan banyu lewih adoh maning.

Surat kabar Zimbabwe Chronicle ngungkapna nek 93 gajah dikirim meng taman-taman nang China karo UEA nang taun 2012 kanthi 2018. Gajah-gajah mau dikirim karo cara sing aman lewat montor mabur. Sijine, gajah mau diregani mulai kan USD 13.500 - USD 41.500.

10 taun terakhir, populasi gajah nang Afrika mudun sekitar 111.000 dadi 415.000. Salah siji penyebab sing paling gede yaiku perburuan gading gajah. Mula kuwe, negara-negara Afrika kaya Botswana, Namibia, Zambia, lan Zimbabwe tegas nglarang perburuan gading gajah.

Kepriwe lur? Mbok pada bosen ngingu wedhus karo sapi pisan-pisan ngingu gajah. Men gokil.
Share :