Perjuangan Ngirim Logistik Pemilu 2019 Nang Gorontalo: Mlaku 13 Jam!

Minggu, 14 April 2019 : 11:44
Yuh Waca

Meh pirang dina maning, Indonesia bakale duwe hajat gede-gedean yaiku Pemilu 2019. Mula kuwe, siki logistik Pemilu 2019 ngesuk wis mulai dibagikna meng sekabean wilayah nang Indonesia.

Salah sijine daerah mau ya kuwe Gorontalo. Nanging pendistribusian logistik pemilu nang Gorontalo kadang kudu dilakoni karo perjuangan sing abot.

Tepate pas ngirim meng Gorontalo pedalaman sing kudu butuh perjuangan banget. Sebabe, sing ndistribusikna kudu mlaku disit ngantek 13 jam. Jan, butuh perjuangan banget mbok?

Perjuangane ora mung mlaku 13 jam, tapi logistik mau juga kudu dipikul.

Kotak lan surat suara mau mulai dibagikna dina Minggu esuk nggo njangkau daerah terpencil lan adoh.

Anggota Komisioner KPU Provinsi Gorontalo, Sophan Rahmola, njelasna nek nang Kecamatan Pinogu ana limang desa terpencil sing adoh lan ora bisa diakses nganggo kendaraan roda papat lan ojek montor.

"Dina kiye dewek nglepasna logistik pemilu menyang Kecamatan Pinogu,Kabupaten Bone Bolango sing medane cukup parah lan terjal. Meh 13 jam mlaku logistik kiye bakal digawa nang warga sing disewa jasa pikule. Ana 40 kotak nggo TPS. 13 kotak kosong nggo rekapitulasi tingkat PPK lan kertas suara," jere Sophan Rahmola.

"Dewek wis mutusna kudu mlaku. Lan kiye wis sering dilakoni pas ana pesta demokrasi pemilu. Mlaku bisa sampe 13 jam. Lan logistik kiye langsung mengkantor PPK lan wis ana gudang sing disiapna", tambahe Anggota Komisioner KPU Provinsi Gorontalo mau.

Total wong sing dikongkon mikul ana 24 wong. Saben wong ana sing mikul rong kotak, ana juga sing mikul patang kotak suara.

Logistik-logistik kiye diperkirakna bakal jog PPK Pinogu ngko mbengi.

Bener-bener perjuangan ya, arep nganakna pemilu. Lah rika sing nang kene dikepenakna malah pada golput. Aja pada golput lur! Eling, tanggal 17 mayuh pada meng TPS nang daerahe masing-masing.
Share :