Dara Balap Asal Belgia Payu Rp 20 Milyar, Kiye Wujude

Selasa, 19 Maret 2019 : 12:50
Yuh Waca

Sapa sing nang kene tukang bur-buran dara saben sore? Jel ngacung. Darane sampeyan pada rega pira lur? Paling-paling sewidakewu sejodo mbok? Paling pol ya atusan ewu utawa jutanan lah.

Nang aring Belgia, ana dara sing regane Rp 20 milyar. Dara 20 milyar kuwe jenengane Armando, sing merupakan dara spesialis balap.

Armando kuwe dara balap jarak jauh paling bagus se-Belgia. Seurunge payu, jane wong-wong wis bisa ngira-ngira nek Armando regane bakal lewih dhuwur kan dara seurunge sing mung payu Rp 6 milyar utawa 376.000 euro.

Tapi ora ana sing nyana nek Armando regane bakal mundhak ngantek Rp 20 milyar. Kok ana ya wong gelem tuku dara regane semeno?

Jebule sing tuku Armando kuwe wong kan negara China.

"Awal minggu kiye jelas nek Armando bakal dadi dara paling larang sing tau didol nang lelang online," tulis Pigeon Paradise. Pigeon Paradise kuwe situs khusus dara. Dadi mbok rika arep pada nggolet dara pisan-pisan meng ngonoh lur.

"Tapi ora ana sing tau nyangka nek regane bakal nembus sejuta euro lewih", lanjutane pas Minggu (17/03).

Resmi, Armando payu diregani lewih kan Rp 20 milyar, tepate 1.252.000 euro.

Mbok ana sing kepengin ngerti wujude, kiye deleng gambar ngisor kiye.


Dara kuwe bakale arep diternakna nggo ngasilna bibit-bibit dara balap unggulan liyane. Armando maune duwene peternak asal Belgia sing wis kondang lan disegani wong akeh. Jenenge Joel Verschoot sing duwe peternakan dara nang kota Ingelmunster, Belgia Kulon.

Nang lelang online sing ditutup dina Minggu wingi (17/03), keluarga peternak dara mau wis adol total 178 manuk dara . Total kasile, Joel ulih sekitar 32 milyar utawa 2 juta euro.

Dara sing sering dienggo balap biasane merpati pos. Nang kana, dara diburna kan jarak ngasi atusan kilometer, lah nang ngko sing paling cepet mbalik meng kandang, ya kuwe pemenange. Ya ora beda karo nang kene lah ya lur?

Nang Eropa, tradisi bur-buran dara esih bisa ditemoni nang Belgia, Inggris, Perancis lor, lan Belanda.
Share :